Hey strangers!
Ich wett ez vo mine Momente verzelle, weiss aber nöd ab wellem Jahr ich sett afange. Drum hani gdenkt ich verzell eu jetzt eifach chli wies so früehner i minere Chindheit gsi isch und dänn so öppe ab 2008/2009 hend die Jugendmomente erst agfange.
Ich bin eigentlich scho immer es speziells Chind gsi. Bin voll verrükt gsi, han immer voll umeblödet mit mine zwei Gschwüsterti, Yawhuei 7 Jahr älter und Juwi 3 Jahr älter. Bi Verwandte oder Fremdi binich dänn immer muksmüüsli still gsi und han keis Wort gshnurrt^^ Und ja mini Mum, die lieb ich, sie isch so e liebi herzigi und lustigi Frau!
Sie bedütet mir am meiste und es duet mir au huerre Leid, dass sie weg mir immer so niedergschlage und enttüscht isch. Ich bin es schlimms chind mit 17, wiel ich znacht usegang und sie blibt immer bis dänn wach, bis ich wieder hei chum. Und wiel sie alles usegfunde het mitm trinke, rauche, kiffe und sogar Kondoms het sie bi mir gfunde haha. Aber ja jetzt bini abgschweift, ich wett ja verzelle was früehner gsi isch. Sött ja immerhi keis Tagebuech si ^^
Ich han nie döffe use gah, nur 10-30 Minute vor de Wohnig in Buecholzrain. Aber ich han nie druf glost, wiel ich scho dött gwüsst han, dass es eifach zwenig isch. Irgendwänn mal hani mehrmals bis e Stund verspötig kah. Scho döt hani rebelliert kah und das het dänn au en Ifluss uf mini Jugendzit oder eifach uf min Charakter kah. Mini eltere hend scho oft gstritte, weg de chinder, wegm Geld und so witer. Im gegesatz zu anderi Bünzlichinder, hani scho e trurigi Chindheit kah..^^
Anyway! Ich bin zerst im chindsgi gsi und han döt zwei besti Kollegine kah, Melodie und Gordana. Mit de Melodie bin ich immer no sehr guet befründet aber gsehn sie eifach nur iwie 10 mal im Jahr, wiel sies au streng mit de Eltere het und Stress weg de Schuel. Aber für das gits ja Whatsapp :P Ich han bi de Frau Gubler kah und die het mich so psycht.
Dänn 1.-3. Chlass hani Schuel bi de Frau Dobler kah und sie isch e extrem strengi Frau. Ich han döt d'Naomi und Dirin kenne glernt, wo au mini besti Kolleginne gsi sind und mit de Naomi hanis bis jetzt au no super :D Friendsforlive, im ernst! (Ich bin nöd naiv :PP) Mit de Naomi hani die schrääägsti Sache erlebt. Mir hend immer Modeschau gspielt und Plän gschmiedet wie mir de Fabio e Grube baue chönt, demit er ine keie chan und wie mir Dirin und Gordana "verkupple" chönt, wiel sie eus irgendwänn uf de Sack gange sind.. teuflisch :P Oder mir hend au immer gern Experimente gmacht, indem mir Blätter und Blüete gsammlet hend und die vermischt hend. Mir hend demit welle Parfüms mache haha dummi Chinder. Ich lach jetzt mit de Naomi immer no über so komishi sache und mir hend wie euse eigete Humor haaha :D
Ide 4. Klass binich bi de Frau Vonesch gsi, chli e nöd so geili Zit gsi, wiels so Grüpplis kah het. Ich has mit de "coole" ghengt(jetzt sind all versauti chöpf, schlimmer als ich) und han strit mit de Naomi kah :( Egal, isch nöd so e wichtigi Zit gsi^^
Ide 5.Klass hani dänn müesse zügle, nöd wiit e weg. Grad da bim Buecheggplatz. Ich fang ez mal mit de Jahreszahle ah, wiels besser isch :) Fortsetzung folgt ;))
Greezypeace
Keine Kommentare:
Kommentar veröffentlichen